പരീക്ഷണം 71
കല്ക്കണ്ടം കത്തിക്കാം
ആവശ്യമുള്ള സാധനങ്ങള് തുല്യ വലിപ്പമുള്ള രണ്ടു കല്ക്കണ്ട കഷണങ്ങള് ,തീപ്പെട്ടി ,അല്പം ചാരം
ചെയ്യുന്ന വിധം
രണ്ടു കല്ക്കണ്ട കഷണങ്ങളും മേശപ്പുറത്ത് വയ്ക്കുക .ഒന്നിന്റെ മുകളില് അല്പം ചാരം ഇടുക . തീപ്പെട്ടി കൊള്ളി കത്തിച്ചു കല്ക്കണ്ടത്തില് കാണിക്കുക . ചാരം ഇട്ട കല്ക്കണ്ടം കത്തുന്നതായി കാണാം .ചാരം ഇടാത്തത് കത്തുന്നുമില്ല
ശാസ്ത്ര തത്വം
ഇവിടെ ചാരം ഉള്ളത് കൊണ്ടാണ് ഒരു കല്ക്കണ്ട കഷണം വേഗത്തില് കത്തിയത് .ചാരം ഇവിടെ ഉല്പ്രേരകം ആയി പ്രവര്ത്തിക്കുന്നു . സ്വയം രാസമാറ്റത്തിനു വിധേയമാകാതെ രാസപ്രവര്ത്തനത്തിന്റെ വേഗത വര്ദ്ധിപ്പിക്കുന്ന പദാര്ഥങ്ങള് ആണ് ഉല്പ്രേരകങ്ങള്
പരീക്ഷണം 72
ഇരുമ്പാണിയുടെ നിറം മാറ്റാം
ആവശ്യമുള്ള സാധനങ്ങള് ഒരു ടെസ്റ്റ് ട്യൂബ് , പുതിയ ഇരുമ്പാണി,തുരിശ് ലായനി
ചെയ്യുന്ന വിധം
ടെസ്റ്റ് ട്യൂബില് തുരിശ് ലായനി എടുക്കുക .ഇതിലേക്ക് പുതിയ ഇരുമ്പാണി ഇട്ടു വയ്ക്കുക .കുറച്ചു സമയം കഴിഞ്ഞു നിരീക്ഷിക്കൂ .ആണിയുടെ നിറം മാറി ചെമ്പു നിറമായിരിക്കുന്നതായി കാണാം
ശാസ്ത്ര തത്വം തുരിശുലായനിയില് കോപ്പര് സള്ഫേറ്റ് അടങ്ങിയിട്ടുണ്ട് .ഇവിടെ ഇരുമ്പ് തുരിശു ലായനിയില് നിന്നും ചെമ്പിനെ ആദേശം ചെയ്യുന്നു .അതാണ് ആണിയുടെ പുറത്ത് ചെമ്പിന്റെ ഒരു ആവരണം ഉണ്ടാകാന് കാരണം .ഒരു ലോഹത്തിനു അതിനേക്കാള് പ്രവര്ത്തന ക്ഷമത കുറഞ്ഞ ഒരു ലോഹത്തെ അതിന്റെ സംയുക്തത്തില് നിന്നും ആദേശം ചെയ്യാന് കഴിയും
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ